中國第一個留學生、中國首位鐵路工程師，呢啲傳奇人物阿史以往都同大家介紹唔少，但佢哋嘅身份都係以男性居多，咁到底中國近代有冇出過一啲傑出嘅女性呢？咁就當然有啦，阿史今次要介紹嘅就係鄭毓秀。
鄭毓秀出生喺1896年嘅新安縣西鄉，佢係近代時司法界相當出色嘅一個人物，咁到底佢成材之路係點呢？鄭毓秀少小離鄉，加入過孫中山先生嘅「同盟會」，曾經參與過反清革命事業，亦都嘗試反北洋政府，係近代進步知識分子。之不過，淨係參加革命係唔足以令到自己進步，佢崇尚「女權」，畢生以「新女性」風采示人，所以喺1912年佢就到法國勤工儉學、1917年喺巴黎大學法學碩士學位，隨即加入法國法律協會，甚至後來仲拎埋巴黎大學法學博士學位，成爲中國歷史上第一位女性法學博士。
喺返到國家之後，佢就同留學時代嘅友人魏道明合作開設律師事務所，成為中國歷史上第一位女性律師。喺仕途上佢亦都相當順利，曾經做過江蘇省政務委員會委員、上海臨時法院院長、江蘇地方檢察廳廳長等等，甚至連民法編纂委員都有佢份，真係前無古人！
原圖嚟自網絡