繼續同史友們介紹我國嘅傳奇人物，喺戰爭之中拎到一等功嘅英雄戰士阿史就同大家介紹過唔少，要知道拎一次一等功已經係相當困難嘅事，而其實我國史上係有一位抗戰老兵足足立咗十次一等功，佢個名叫做肖萬世！
肖萬世出生喺1905年河北一個貧苦家庭，因為日本發動盧溝橋事變，抗日戰爭全面爆發，華北地區迅速被日軍佔領，肖萬世嘅家鄉亦都唔例外。喺國仇家恨之下，當時32歲嘅肖萬世就同兩個哥哥一齊加入游擊隊，負責騷擾、消滅日軍，一度成為日軍眼中釘。之不過喺漢奸出賣之下，日軍就得知肖氏兄弟就係游擊隊成員，組織大批兵力向佢哋所在嘅村莊進發。雖然游擊隊有進行到反擊，但村落仍然傷亡慘重，佢嘅兩個哥哥一死一失蹤。
自此之後，肖萬世就立志要為死去嘅親人同埋鄉親報仇，加入八路軍第129師386旅772團，以長矛作為武器殺死唔少日軍，甚至仲被稱為「肖大膽」、「不要命」。喺長生口戰鬥當中，佢就一連殺死十九個敵人；長樂村戰鬥，更喺日軍圍攻之中成功突圍。
肖萬世一次又一次捨生忘死，參加過百團大戰，淮海戰役，渡江戰役，解放大西南等等，因為英勇表現為佢立下10次一等功，12次二等功，所獲各種勳章有五六十枚。佢深藏功與名55年，最終喺2009年4月2日因病去世，享年104歲。
原圖嚟自網絡