巴勒斯坦

阿史早幾日睇新聞話，英國威廉王子下個月會出訪以色列同巴勒斯坦，係皇室首位官式出訪以巴兩地嘅成員。呢兩個國家最近因為巴勒斯坦喺「土地日」向以色列示威，被以色列軍方開槍殺咗十幾人，多人受傷，事件震驚全球。

每年嘅3月30號「土地日」，係巴勒斯坦用嚟紀念1976年當日巴勒斯坦人喺守護土地抗爭發生嘅慘案，當時以色列政府宣佈計劃將加利利地區嘅土地用嚟做住宅用地，其中一部份土地係巴勒斯坦人所有，為表示反對，巴勒斯坦人發動大罷工同遊行。以色列佔領軍向示威者開槍，導致6人死亡，幾百人被捕。

長期以嚟，巴勒斯坦嘅衣食住行都被以色列控制，以色列賣俾巴勒斯坦嘅水電、能源，全部都比賣俾以色列人貴兩到三倍。住喺東耶路撒冷嘅巴勒斯坦人，就算係永久居民，都冇投票權，無得參政，而大部份嘅巴勒斯坦人更加被以色列定為非法居民。如果巴勒斯坦人返工返學經過以色列軍站崗嘅哨站，肯定會被搜身查文件，一等可以係幾個鐘。住喺西爾萬（Silwan）嘅巴勒斯坦人，佢哋嘅屋企2年內可以被以色列軍人強拆10次，佢哋日日都要面對住放工返歸但搵唔到自己屋企嘅恐懼。