上次同大家介紹尼泊爾尼瓦爾族嘅文化傳統，同埋族中女性第一次嘅「果實婚姻」，今日就同大家講埋佢哋另外兩次婚姻。

等小新娘再大啲，就會舉行第二次婚禮，嫁畀太陽。小新娘要住入一間無光線嘅黑屋11日，飲食由家族嘅女性傳遞，期間唔可以見任何外人同男性。到咗第12日，小新娘要好早起身，响太陽未出嚟之前沖涼同搽香膏，跟住會被蒙眼帶上天台。旭日初升之時，小新娘嘅眼罩會被揭開，開始膜拜「第二任丈夫」——太陽，代表淨化。

到咗第三次，尼瓦爾族女性先係真正出嫁。婚禮首先由未來叔仔或丈夫嘅朋友帶隊人去接新娘，當新娘去到婆家，未來奶奶會幫新娘洗腳、送對銀腳環比新抱仔同埋幫佢戴，之後再畀條新屋鎖匙比佢，代表佢展開新嘅人生旅程。

新娘入咗婆家門之後，新郎新娘就會齊齊拜神，再互相响對方額頭點個吉祥點，用同一個餐盤食嘢，並接受賓客嘅祝福，婚禮去到依步，先算係完結。據講，如果結婚之後女方覺得唔幸福，只要將「首任丈夫」，即係個孟加拉蘋果放响老公枕頭隔離，就可以回復自由。