上禮拜四（17號），馬其頓總理柴伊夫表示，佢同希臘總理齊普拉斯就住「馬其頓」呢個長久以嚟嘅國名之爭達成協議，並已經有一個雙方都同意嘅解決方案。點知，後來馬其頓在野黨強烈反對依項提議，結局如何真係好難估。

為咗「馬其頓」呢個國名，希臘同馬其頓足足嘈咗成27年，今年1月更加有14萬希臘民眾喺雅典憲法廣場度抗議馬其頓唔應該叫「馬其頓」，因為佢哋認為馬其頓係希臘嘅。

自從1913年第二次巴爾幹戰爭之後，《布加勒斯特和約》（Treaty of Bucharest）將馬其頓宜家嘅領土分成愛琴馬其頓（Aegean Macedonia）、皮林馬其頓（Pirin Macedonia）同埋瓦達馬其頓（Vardar Macedonia）依次分俾希臘、保加利亞同塞爾維亞。直到1945年第二次世界大戰結束之後，瓦達馬其頓成為南斯拉夫社會主義聯邦共和國嘅成員，並改名做「馬其頓社會主義共和國」。而呢場「國名之爭」，就由1991年「馬其頓社會主義共和國」從南斯拉夫獨立，成為一個新國家——「馬其頓共和國」開始。希臘認為「馬其頓」係希臘文化同歷史嘅一部分，堅稱古代馬其頓屬於希臘文化不可分割嘅一部分，而現時希臘北部嘅領土就叫做「馬其頓」。

早期，馬其頓選用咗古馬其頓嘅「維吉納太陽」（Vergina Sun）嚟做國旗，仲用亞歷山大大帝嚟命名機場同地下鐵路，呢啲行為都引起咗希臘人反感，認為馬其頓偷咗古馬其頓嘅文化，所以希臘人對於「馬其頓」嘅國名，乃至佢嘅歷史、語言嘅正當性同合法性都予以否定，堅決反對馬其頓用「馬其頓共和國」呢個國名，仲對馬其頓採取經濟封鎖，拒絕馬其頓加入北大西洋公約組織同歐盟。

為咗入聯合國，馬其頓用咗「前南斯拉夫馬其頓共和國」（Former Yugoslav Republic of Macedonia，FYROM）呢個名加入，仲喺1995年修改咗以維吉納太陽為圖案嘅國旗。但係，馬其頓唔理希臘反對，對內對外依然堅持用「馬其頓共和國」呢個國名。宜家全球有超過100個國家同地區都用緊「馬其頓共和國」呢個國名，一旦馬其頓改名，幾乎全世界關於馬其頓嘅資料都要更新。

圖片來源：路透社