馬來西亞早前政壇大地震，92歲嘅馬哈蒂爾成功回朝，再次做總理，令香港人對大馬多一份關注。阿史近排識咗個馬來西亞嘅朋友，一於唔執輸，了解吓依個國家。阿史嘅朋友唔單止識講馬拉話，仲講到一口流利英文、廣東話、普通話同閩南話，阿史真係輸得心服口服。呢位大馬朋友話，其實好多土生土長嘅馬來西亞人普遍識3種或以上嘅語言，呢層固然有歷史因素，但同佢哋嘅教育制度都有好大關係。

喺馬來西亞，絕大部份嘅小學都係政府學校，呢啲政府學校又根據教學語言分成三類：以國語（馬拉話）作為主要教學語言嘅國型小學（國小）；以華語作為主要教學語言國民型華文小學（華小）；同埋以淡米爾語（Tamil，印度、斯里蘭卡嘅官方語言）作為主要教學語言嘅國民型淡米爾小學（淡小）。呢三類小學嘅教學語言雖然唔同，但國文同英文都係華小同淡小嘅必修、必考科目，所以好多馬來西亞人自細就識三種語言。其實，之前仲有以英文為教學語言嘅國民型英文小學（英小），不過自從《1967年國語法案》通過之後，英小就喺70 年代中期全部改為國小喇。