近排啲天氣時晴時陰，熱嗰時誇到可以喺地下煎熟隻蛋，香港好多女士嘅背心、短裙、熱褲一早出動晒，但估唔到連女警都可以著短褲？香港就梗係唔得啦，阿史講緊嘅係黎巴嫩一個西部小鎮卜魯馬納嘅女警。呢個小鎮嘅市長為咗改變黎巴嫩喺西方國家心目中嘅形象，並希望吸引更多遊客，所以推出新式女警制服：黑色T恤配同色熱褲，再戴埋紅色貝雷帽，認真清爽。

黎巴嫩係極少數並非以伊斯蘭教做國教嘅中東國家，成個國家有大概54%嘅人口信奉伊斯蘭教，主要係什葉派、遜尼派同德魯茲派。而其餘46%信奉基督教，主要有馬龍派、希臘東正教、羅馬天主教同埋亞美尼亞東正教等。所以相對比起其他阿拉伯國家嚟講，黎巴嫩係個比較開放嘅國家。

對於呢套咁新穎嘅制服，女警們就舉雙手贊成，不過亦都有唔少人認為著到咁唔單止有損執法人員嘅形象，更有「消費女性」嘅嫌疑。史友們又點睇呢？