上次講到，警隊喺1949年招募咗第一位女警高健美。講返當年嘅招募，其實一啲都唔順利，因為當時警隊招募1名女副督察同10名女警士，女副督察需要識英文同接受六個月訓練，而女警士就要識寫中文同接受三個月訓練。但當時社會比較多文盲，同埋女性都好少離家生活，所以原先無人應徵，後來警隊降低要求，毋須接受六個月同三個月訓練嘅情況下，有5個人申請女副督察，經過多輪面試之後，警隊就成功招聘第一位女副督察高健美。

高健美喺馬來西亞婆羅州出世同成長，通曉英文、廣東話、普通話、馬拉話、福建話同潮州話，佢獲委任為女副督察之後，擔任警務處處長麥景陶嘅私人秘書，另外亦負責傳譯、錄口供同搜查女性嘅工作。之後佢派駐九龍刑事總部，負責檢舉賣淫、聚賭及同道德有關等案件。去到1951年，警隊再次招募女警，高健美獲指派成為學堂首名女教官，協助吳君實督察訓練10名女警學員，之後一直專責管理女警部，為女警隊伍發展作出貢獻。

高健美表現出色，多次獲得嘉許，其中1951年嘅謀殺案最令佢印象深刻，當年兩名夜更巡警於荃灣被人襲擊頭部及搶去配槍，幾日後，另外兩名巡警被人槍擊同搶去配槍，更傷重死亡。高健美話，「警隊成立咗特別調查小組，本來响警校負責訓練女警嘅我亦被委派參與調查工作。」雖然當時有不少人被扣查，但各人仍然茫無頭緒，觀人於微嘅佢忽然察覺有批線人有問題，於是從佢哋身上著手調查，最終發現批「問題線人」原來係真兇，涉及九龍城一宗劫案嘅械劫集團，並用搶嚟嘅警槍犯案。全靠高健美，單案嘅犯案集團被判罪名成立，主腦被判死刑。

喺1960年，警隊改制取消副督察職級，本身係女警部主管嘅高健美就升做署理警司。不過一年之後，警隊喺英國請咗個只有十年警長經驗嘅羅慧儂（Marjorie Elsie Lovell）嚟香港做署理警司，高健美降返去做督察，佢質疑做法涉及種族歧視，最後於45歲選擇提早退休，離開警隊。