啱啱有同事去完哈薩克斯坦返嚟分享吓旅行見聞，阿史load咗一陣先諗起佢個地理位置，呢個喺亞洲中部嘅國家，就喺新疆上面，蒙古隔離。講起呢個亞洲最大嘅內陸國家，佢出名多天然氣資源同靚女，今年仲有個影響相當大嘅改革添。

今年二月，哈薩克公佈咗一套以拉丁字母為基礎嘅新字母，取代之前用開嘅西里爾字母（又被稱為「斯拉夫字母」，喺斯拉夫語族大多數民族通行嘅字母書寫系統），呢個文字改革一推出，就受到大批民眾批評。新版嘅32個字母入面，只有23個同英語一樣。當中保留咗4個西里爾字母：A、E、I和O。

政府計劃喺2025年之前全面改用拉丁字母，喺呢個俄語比哈薩克語更加普及嘅國家，要推行拉丁字母仲要全面改用，可謂道阻且長。點解咁講？根據哈薩克斯坦2016年嘅人口普查，全國約有三分之二嘅人口為哈薩克族，大概20%係俄羅斯民族，但由於前蘇聯曾統治哈薩克多年，所以幾乎人人都講俄語，逾1800萬人入面差唔多有成94%嘅人掌握流利俄語，而佔74%嘅哈薩克語都只係排第二。哈薩克鄰近嘅其他國家，例如阿塞拜疆，早喺1991年蘇聯解體之後就陸續開始轉用拉丁字母，而哈薩克宜家先推行拉丁字母，遲過人地廿幾年，唔單止令民眾適應唔切，仲大大增加咗改革嘅經濟成本。

圖片來源：網上圖片