响中國嘅「一帶一路」整體戰略規劃當中，能源戰略係整個國策其中一個好重要嘅部份。好耐之前介紹過巴基斯坦同中國合作發展瓜達爾港，為中國能源運輸提供咗一道便利之門。事實上，中國一直以嚟都好積極爭取同緬甸合作，成為中國能源戰略其中一個重點合作國家。

一直以嚟，中國嘅能源原材料都係由外國入口為主，以石油為例，中國約有五分之四嘅進口原油必須途經馬六甲海峽，運輸途中唔單止變數多，而且當中國同東南亞國家關係緊張時，中國能源供應就可能出現問題。所以，中國一直以嚟都爭取响印度洋有一個港口，再配合輸油輸氣設備，將能源原料從內陸入口中國。所以，中國一直爭取緬甸合作，實現呢個能源戰略計劃。响2017年4月，中國同緬甸簽署咗《中緬原油管道運輸協議》，中緬原油管道投入運作。

不過，中緬關係長期都有好多不穩定因素存在，好似緬甸國內政局不穩、國內反華情緒不時高漲、湄公河水資源爭拗，甚至中緬邊境少數民族武裝衝突，都影響到中緬關係同兩國合作。好似剛才提及嘅响中緬原油管道，其實响2015年試行運作後就停咗，閒置兩年後先再重新啟動。