「一個錢學森，抵得上五個海軍陸戰師！」美軍將領依句話一啲都唔誇。中國航天之父錢學森生於上海，自從佢喺上海交通大學畢業之後就去咗美國攻讀碩士同博士課程，師承空氣動力學權威馮卡門教授。錢學森1939年發表著名論文《可壓縮流體的二維亞音速流》，後被學界稱為錢-卡門公式。

錢學森先後喺美國麻省理工學院同加州理工學院做教授，後嚟同馮卡門合作參與美國絕密嘅曼哈頓工程——研發導彈核武器，仲擁有美軍上校軍銜。錢學森1949年想返中國，但被美方拒絕，仲一度被囚禁同監視。直至1955年，中美雙方交涉，美方先同意用錢學森嚟交換喺韓戰被俘嘅美國飛行員。當時美國方面仲話寧願槍斃咗佢，都唔想放佢返中國，錢學森嘅重要性可見一斑。

錢學森返中國之後，被委託全權負責組建、研究火箭導彈嘅國防部第五研究院。多得錢學森，酒泉於1960年9月用國產染料發射「東風一號」近程地對地導彈，係第一枚國產導彈。1970年，「長征一號」運載火箭升天，將中國自行研製嘅「東方紅一號」衛星送咗上太空。十年後，中國第一枚長程火箭由酒泉基地發射，30分鐘後準確喺南太平洋預定海域降落，成為世界上第三個進行遠程火箭全程飛行試驗嘅國家。科學界認為，錢學森至少令中國嘅導彈技術進步20年，奠定咗中國導彈同衞星技術嘅基礎。

除咗航天事業之外，錢學森仲係中國系統工程嘅開創者同奠基人。錢學森提出嘅系統工程嘅思想同方法，專門針對當時社會管理效率、生產力低嘅現實問題。種種威水史，令錢學森被譽為20世紀中國最偉大科學家以及「火箭之王」。

圖為東方一號、長征一號同東方紅一號衛星。