三歲定八十，老人家講嘅說話總有佢嘅道理。中國第一位奧運冠軍、射擊好手許海峰細細嘅已經中意玩玩具槍，中學畢業後，佢買咗支氣槍，間唔中用嚟射樹上嘅雀仔竇、飛蟲咁（大家唔好學呀）。1984年許海峰入咗國家射擊隊，同年7月參加洛杉磯奧運會，於男子自選手槍慢射個人賽中，以566環嘅成績奪得中國史上第一塊奧運金牌，而隊友王義夫就以564環成為銅牌得主。

許海峰後嚟好謙咁話，當時邊個發揮得好，邊個就攞冠軍，佢記得當年實現「零的突破」後，等頒獎典禮等咗半個幾鐘，之後見到場外有架直升機降落，再由電單車送咗啲嘢嚟。究竟係咩？原來係一面中國旗。話說奧委會方面預先準備咗一面中國旗，無諗到中國隊一舉奪得兩塊牌，唯有快手快腳去借多一面旗，先至夠數舉行儀式。

至於站上冠軍位置嘅許海峰同樣準備不足，佢無諗到自己攞到金牌，領獎套衫得上身無下身，只能夠問隊友借條褲嚟著，佢自己話條褲「根本唔啱身」。洛杉磯奧運後，許海峰於1988年漢城奧運奪得銅牌，1995年退役，後嚟佢做過國家女子射擊隊教練，塑造出杜麗、陶璐娜等金牌選手，令許海峰成為名副其實嘅金牌運動員同金牌教練。

圖片嚟自網絡。