最近關於難民嘅話題持續發酵，美國用「零容忍」政策拒絕難民入境，歐洲各國之前雖然相繼收容咗部份難民，但長貧難顧，好幾個國家已經開始對難民潮採取相應政策。奧地利幾日前發表咗一份聯合聲明，警告德國如果將被拒入境嘅難民遣返至奧地利，奧地利會重新評估邊界政策，唔排除會關閉對意大利同斯洛文尼亞嘅入境通道。

德國內部早前就難民問題取得一個初步協議：已經喺其他歐盟國家填表登記嘅難民，雖然唔會拒絕佢哋入境，但會先送去德國同奧地利邊境暫時收留中心度安置。呢啲難民經過審核之後，無通過申請嘅會被遣返至本來嘅國家，如果該國政府拒絕接收，最後嘅解決辦法就係送去奧地利。奧地利聽到呢個協議就梗嬲，於是出咗份聯合聲明。

德國可以將啲難民推俾奧地利，係基於當初簽訂嘅《申根公約》。《申根公約》原本目的係取消公約國之間嘅邊境檢查點，令歐盟國家嘅居民可以自由來往，唔受邊界限制，方便各國貿易、交流。而其他國家嘅遊客亦只需取得歐盟國其中一個國家嘅簽證，就可以暢遊多國。由於公約國之間嘅海、陸、空三路嘅邊境關卡檢查取消，難民湧入歐洲之後，變相可以喺咁多個國家之間自由流動，處理難民嘅去留、接收問題就更加棘手。