近期，東南亞國家緬甸爆發羅興亞難民危機，引起國際高度關注。作為中國响「一帶一路」國策一個重要合作伙伴，呢個國家嘅國內形勢絕對值得大家留意一下。

咁究竟緬甸嘅羅興亞難民係點出現嘅呢？羅興亞人生活响緬甸若開邦，若開邦位於緬甸西北海岸，昔日稱阿拉干，接壤孟加拉。响十八世紀，英國先後征服印度同緬甸，成為英國遠東嘅殖民地。而英國殖民期間，殖民政府就將羅興亞人從孟加拉殖民到阿拉干。但問題嚟喇！羅興亞人同緬甸人係唔同嘅種族，宗教信仰亦都唔同。所以，緬甸人一直認為羅興亞人只係外來人，唔屬於緬甸嘅種族。

响緬甸脫離英國獨立後，緬甸人同羅興亞人之間嘅矛盾愈嚟愈深。羅興亞人曾經提出若開邦成為自治洲，但遭緬甸政府拒絕。1982年，緬甸軍政府頒佈國籍法，將緬甸公民分為普通、準公民、歸化三種身份，羅興亞人被視為殖民地時代遺留下來嘅孟加拉移民，並唔享有國民資格，唔可以自由遷徙，亦唔可以擁有土地。羅興亞人响緬甸只能從事低下工作，好多羅興亞人為咗有更好生活於是偷渡去其他東南亞國家。

另一方面，部分羅興亞人為咗同緬甸政府對抗，組織咗武裝力量同緬甸政府對抗。而响緬甸政府眼中，呢班羅興亞武裝分子屬於恐怖份子，兩方不斷發生流血衝突。近期雙方嘅衝突，導致數以萬計羅興亞人逃離家園，羅興亞難民危機就係咁出現。