2018年世界盃就咁就完咗，搞到阿史近排都有啲失落，下一屆要等到4年後，真係等到頸都長。2022年嘅世界盃主辦權俾卡塔爾攞咗，將會破天荒咁喺冬季舉行，當知道呢個消息果陣，相信好多史友都會同阿史一樣，忍唔住「吓」咗出嚟。

點解？卡塔爾雖然地方細細，但勝在有錢，據講籌備世界盃嘅總預算大概係2000億美元（對比返之前巴西同俄羅斯世界盃嘅總開支110億美元同130億美元，毫無疑問係天文數字！）不過，作為一個從未參與過世界盃正賽嘅國家，由卡塔爾舉辦世界盃，其認受性真係麻麻。加上卡塔爾係個伊斯蘭教國家，其法律禁止喺公共場合飲酒，但球迷喺賽事期間飲啤酒已經變咗必備節目，呢個宗教問題卡塔爾又會點解決？咁樣一個冷門國家之所以可以喺云云對手（同時申辦2022年賽事主辦權嘅國家仲有美國、韓國、日本、澳洲）之中跑出，有消息話係因為卡塔爾用「黑手段」抹黑對手同賄賂FIFA成員嚟獲得，仲要全世界就佢改喺冬季舉辦世界盃咁話。

傳聞嘅真確性有幾多阿史唔知，但係卡塔爾要喺冬季先嚟開波，好大原因係因為卡塔爾嘅夏天閑閑地都有40、50℃，咁嘅天氣就算球場入面有冷氣，解決左高溫問題，但球場以外都避唔到酷熱天氣，所以改喺冬季氣溫就最適宜喇。

圖為卡塔爾世界盃體育場之一。