阿史有個中同就嚟結婚，睇佢facebook話準新娘想去斯洛文尼亞度蜜月兼影婚紗相，貪果度嘅景夠晒仙氣，可以影到童話式嘅婚紗相。阿史就上網搵吓斯洛文尼亞啲相嚟睇，唔睇由自何，一睇連阿史都想跟住個中同去斯洛文尼亞視察吓蜜月環境。

特里格拉夫國家自然公園（Triglav National Park）係呢對準新人嘅目的地之一，呢度係斯洛維尼亞唯一嘅國家公園，有世界聞名嘅朱利安阿爾卑斯山（Julian Alps），可以享受滑雪樂趣之餘，仲可以遊覽壯麗嘅特里格拉夫峰（Triglav）、薩維卡瀑布（Slap Savica），欣賞寧靜美好嘅人間仙境──博希尼湖（Bohinjsko jezero）同碧湖（Lake Bled）。

不過呢一對新人最想去嘅地方莫過於布萊德島（Bled Island），因為根據斯洛文尼亞嘅傳說，掌管愛同生育嘅女神Živa就住喺布萊德島。布萊德島上面嘅聖母升天教堂仲堪稱係地球上最美嘅教堂之一。所以，喺布萊德島度行禮，唔單止可以被Živa女神祝福，仲可以體驗一場童話式嘅婚禮。

斯洛文尼亞雖然只係一個歐洲東南邊嘅小國，但入面嘅靚景真係多到數唔晒，仲出咗個總統夫人添。特朗普嘅現任妻子梅拉尼婭喺1996年去美國發展之前，就係喺斯洛文尼亞嘅小城塞夫尼察（Sevnica）度長大嘅喇。