巴林？係咪諗起《哈比人歷險記》或者《魔戒》入面個小矮人呢？等阿史消除吓歧義先，其實阿史係講緊嘅係Bahrain（國家），而唔係Balin（小矮人）。

巴林（Bahrain）係位於波斯灣嘅一個島國，同沙特阿拉伯之間只有一橋之隔，但就比沙特阿拉伯開放得多，例如喺巴林，女仔可以著吊帶短褲，可以揸車（沙特政府好似計劃緊今年6月准女性揸車）。比起沙特阿拉伯，巴林嘅娛樂多好多，有戲院喇，有club喇，重點係冇沙特阿拉伯咁多限制，所以話巴林簡直係沙特阿拉伯嘅後花園。

同其他中東國家差唔多，巴林嘅主要收入都係以出口石油為主，不過近年油價下跌令巴林嘅出口總值大幅下降，預計未來幾年，巴林依然會繼續出現財政赤字。石油畢竟總有一日會開採完，所以有見及此，早响90年代，巴林已經開始發展、推動多元化嘅經濟，譬如金融業、製造業同運輸通訊業咁。至於旅遊業呢，阿史覺得，除咗巴林城堡（Bahrain Fort）、大清真寺（Grand Mosque）、生命之樹（Tree of Life）、石油博物館（Oil Museum）同埋法赫德國王大橋（King Fahd Causeway）之外，好似都冇乜特別嘅景點。