早兩日講開余仁生第二代當家余東旋嘅發跡史，原來佢同已故影視大亨邵逸夫嘅交情不俗，中間仲有一段成人之美嘅故仔。

話說邵逸夫中學畢業之後，應三哥邵山客之邀去新加坡搞電影生意，余東旋好欣賞邵氏兄弟，特登邀請佢哋嚟自己屋企。兩兄弟應約去到余府，余東旋帶住女朋友黃美珍親自迎接佢哋。飯後，余東旋同邵山客留喺書房傾生意，就叫黃美珍陪邵逸夫去花園散心。就係因為呢一場相陪，邵逸夫同黃美珍發現大家都係電影發燒友，兩人幾乎無話不說，竟有種相逢恨晚嘅感覺，情愫暗生。

好快邵逸夫陷入兩難嘅局面，黃美珍係余東旋嘅女朋友，余東旋對佢有知遇之恩，但佢又心愛黃美珍，一邊係情，一邊係義，真係手心手背都係肉。邵逸夫同黃美珍經常一齊睇戲，慢慢就傳出兩人關係匪淺嘅緋聞，而余東旋聽到之後，竟然一笑置之，仲話：「美珍喜歡電影，有逸夫咁嘅電影行家陪住，係件好事。望住佢哋一齊玩得咁開心，我都高興啊！」後嚟，邵逸夫鼓起勇氣向余東旋坦白，講咗佢同黃美珍相愛嘅事。余東旋聽完之後，唔單止無怪邵逸夫奪人所愛，反而話：「你們嘅事我早有察覺，君子成人之美，老弟既然同美珍真心相愛，就唔駛顧咁多，唔通要美珍成世陪住我依個老頭子咩？」

余東旋嘅心胸之廣唔單止係齋講，喺1937年邵逸夫同黃美珍結婚果陣，余東旋仲送咗成50萬元大禮俾呢對新人嚟做賀禮。作為成名已久嘅華人富商，余東旋有咁嘅胸襟實屬難得。邵逸夫娶到自己心愛嘅女人不特止，仲得到余東旋嘅祝福，邵逸夫好感恩，仲非常感激呢位前輩，所以每次一提起余東旋，邵逸夫就忍唔住眼濕濕。

圖一左起為黃美珍、邵逸夫同方逸華，另外兩張圖係邵逸夫同黃美珍，以及邵逸夫同邵山客。網絡圖片