相信有男性史友最近都留意，前幾年有一位叫梅愛偲嘅中國籍男士，去到烏克蘭留學時娶咗個年輕貌美嘅烏克蘭女士為妻，仲結婚生子。羡煞旁人之餘，佢最近搞咗個跨國相親俱樂部，吸引咗唔少中國男性慕名參加相親活動，有網民仲講笑話梅愛偲先係真正支持「一帶一路」國策咁話。

呢單新聞嘅背後，其實係帶出咗烏克蘭呢個東歐國家女多男少嘅問題。據統計數據顯示，烏克蘭男女比例為0.86（男）：1（女），呢個現象除咗响烏克蘭出現外，鄰國白俄羅斯同俄羅斯都有呢個情況。點解會咁呢？有研究就話其中一個原因係同歷史有關，响二戰時期，太多男性被徵召到前線對抗德軍，結果導致蘇聯各個聯邦國嘅人口都出現女多男少嘅現象，影響至今。而另一個原因就係同呢啲國家嘅飲食文化有關，因為當地人係有飲伏特加呢類烈酒嘅習慣，男性長期喝酒過量有害健康，導致男性壽命比女性短。有統計數據就顯示，年齡層上升，女性比率就愈高。

講多句，雖然呢啲烏克蘭美女嘅報道可能令大家心動，不過有網民就話呢啲軟文都係跨國中介整出嚟。孰真孰假，就唔清楚喇！不過阿史就唔介意去烏克蘭去考察下。（又呼喚機票贊助~~~）