上次介紹咗烏克蘭响蘇聯時期係最富裕嘅加盟共和國，資源豐富軍力又強，不過响蘇聯解體後，烏克蘭國內要養咁多軍備响經濟上一啲都唔划算，結果就係呢個咁特殊情況令中國擁有第一艘航空母艦。
中國第一艘航母係遼寧號，而相信史友們都知道，呢艘航母並唔係中國自主研發，而係將前蘇聯一艘未竣工嘅航空母艦改裝而成。呢艘未峻工嘅航母原名為「瓦良格號」，上世紀八十年代開始建造，而製造地方就係烏克蘭。不過，隨住蘇聯解體，當時完成度只有七成左右嘅瓦良格號就因為無錢而停止建造。後嚟烏克蘭政府就將「瓦良格號」賣咗俾一間澳門企業，呢間企業而投標個陣就話航母會作用賭船之用。雖然過程出現咗唔少波折，但最終「瓦良格號」落入澳門企業手中。
2000年「瓦良格號」離開黑海造船廠，但因為被土耳其阻撓唔俾通過博斯普魯斯海峽令「瓦良格號」滯留响黑海六百幾日，最後「瓦良格號」响2002年抵達中國。2004年，中國政府就向擁有「瓦良格號」嘅澳門企業收購呢艘航母，最終「瓦良格號」經多年續建同改造，响2012年正式交付俾解放軍海軍，亦即係中國第一艘航母遼寧號。
原圖嚟自網絡