李白寫詩叻就連小學生都知，但如果你哋認為李白只係單純嘅讀書人，咁就大錯特錯喇。佢除咗能文之外，劍術都唔差㗎，仲要係個高手。

李白曾經喺詩入面話自己「十五好劍術」，年紀細細就已經對抱打不平嘅行俠生活充滿憧憬。而大概喺李白25歲果陣，佢已經離開屋企，出外遊歷。睇返佢寫嘅詩：「笑盡一杯酒，殺人都市中」、「結髮未識事，所交盡豪雄」、「托身白刃裡，殺人紅塵中」、「十步殺一人，千里不留行」，就知李白為人喜愛結交江湖俠客，至於佢間唔仲會出手殺人嘅描述，究竟係真人真事定係得個諗字，就靠大家自行判斷喇。同李白同時代嘅詩人魏顥喺《李翰林集序》度，都話李白「少任俠，手刃數人」。講到呢度，大家都應該相信李白真係識武功，而且仲唔弱雞㗎。

話說唐代有三絕：李白嘅詩、裴旻嘅劍術、張旭嘅書法。裴旻被稱為劍聖，而李白曾經跟過裴旻學劍術，正所謂名師出高徒，李白嘅劍法肯定唔弱。據講，李白仲係當時嘅武功排行榜上有名嘅高手，認真唔惹小。今時今日嘅遊戲都有用李白嚟做角色原型，好似手游《王者榮耀》入面，李白嘅角色正正就係用劍，不過身份由詩人變咗做刺客，同歷史真係有唔少差距……