揚州無揚州炒飯、廈門無廈門炒米、星洲同樣無星洲炒米，不過蘭州真係有蘭州牛肉麵。

阿史早幾年去甘肅旅行時到過蘭州，梗係要試吓即叫即整嘅蘭州牛肉麵。麵檔大廚將一嚿兩三隻手臂粗嘅麵團，兩三下手勢就拉成一條條細長麵條，整嘅時候仲會撻個麵團撻到嘭嘭聲，好有氣勢。

大廚撒啲蔥花落碗，淋上熱辣辣嘅湯再放入煮好嘅麵條，特別之處係啲圓碌碌嘅麵，講嘅唔係外形，而係啲麵嘅橫切面係一個正圓形。碗麵上面鋪滿好多薄切牛肉，非常足料。可能阿史重口味啦，想用辣椒油將碗牛肉麵「染色」，點知人地啲自家製辣椒油辣到飛起，搞到要狂灌凍可樂。同團幾位好嘴尖嘅兄弟就好中意碗麵湯頭夠清，幾乎食到想搬間麵檔返屋企。

蘭州牛肉麵有多年歷史，據講由清末嘅廚子馬保子發揚光大，當時佢推出「進店一碗湯」，客人一入店就可以免費飲碗牛肉湯，令佢嘅清湯牛肉麵名氣大振，後來經過後人不斷發展，得到「聞香下馬，知味停車」嘅稱譽。