歐洲好多國家都有男女失衡嘅現象，出名多靚女嘅拉脫維亞都係其中一個，佢喺2015年舉辦咗全球第一個「金髮尤物節」，當時吸引咗大批男士爭住同啲金髮靚女影相。當然，阿史今晚講拉脫維亞並唔係為咗講呢個「金髮尤物節」嘅，而係同大家講吓關於「男人天堂」呢個稱號。

網上之前瘋傳拉脫維亞嘅男女比例係1:8，所以被稱為「男人天堂」。阿史對呢個話題相當感興趣，就去搵咗啲資料，發現事實並唔係咁。睇返2018年嘅拉脫維亞人口比例，20-59歲嘅男女比例差距唔大，只係有幾個年齡層嘅女士人數會比男士稍多。好喇，到咗60歲以上嘅人口，就真係男女失衡喇，幾乎每個年齡段女士嘅人數都至少係男士嘅2倍以上！原來呢個就係說好嘅「男人天堂」？

宜家啲資訊太多，要得到真相真係要靠自己多啲搵資料。