對四面環海嘅斯里蘭卡嚟講，港口業務係當地嘅經濟支柱之一，其中位於西部嘅科倫坡除左係斯里蘭卡最大城市之外，亦都係自古以嚟歐亞貿易航線上嘅重要中途港口，歷史上葡萄牙、荷蘭，同英國都先後响科倫坡建立貿易據點。而依家有一間中國企業正响科倫坡幫助建設新嘅港口城。
1948年獨立後，斯里蘭卡响1983年陷入內戰，到2009年先正式結束。長年內戰令斯里蘭卡需要引入外資協助發展，而中國亦作為投資者積極參與該國建設。其中，斯里蘭卡同中國交通建設集團達成咗科倫坡港口城項目協議，响2014年正式動工，協議包括將項目部分土地嘅永久產權交比中國企業。
由於科倫坡嘅地區戰略價值，項目受印度多番阻撓，一度停工。直至2016年，斯里蘭卡將協議入面嘅永久產權改成租賃99年，先令項目恢復推進。不過呢件事無阻斯里蘭卡繼續同中國响港口業務嘅合作，繼科倫坡港之後，斯里蘭卡响上年又將南部嘅漢班托塔港項目交比中國企業開發經營。