大家有無聽過有人係用炸彈嚟做建築材料？正常就應該唔會嘅，不過老撾就係一個例外。

1953年到1975年間，左派嘅老撾人民黨巴特寮（包括好多越南嘅寮國後裔）同右派老撾政府軍，分別喺蘇聯同美國嘅支持下，展開咗一場長達22年嘅內戰。因為越南同美國對外都否認呢場內戰，所以又被美國傳媒描述為中情局喺老撾嘅秘密內戰。內戰入面，超過兩百萬噸炸彈被投放喺老撾境內，其中有30%無即時爆炸，當地人於是將呢啲炸彈物盡其用，攞嚟起屋、整船、種菜等等。呢啲未爆彈仍然有爆炸嘅機會，接觸到嘅人其實相當危險。據估計，自從1973年以來，未爆彈造成超過12,000人傷亡。雖然好多人道組織已經盡可能拆除炸彈，減低所造成嘅危險，但由於殘留嘅炸彈數量太多，難以全部清除，而收集並出售炸彈金屬碎片已經成為內戰之後當地嘅主要工業。