阿史睇娛樂新聞話一位喺新加坡註冊結婚嘅藝人疑似情變，想離婚，但報導就提到喺新加坡，離婚原來唔係一件易事！

阿史八卦走去check吓新加坡嘅離婚手續，發現新加坡嘅夫妻要離婚何止唔易，直頭係難！首先，結婚之後嘅3年內，除非有好嚴重嘅原因例如對方患有性病等，否則唔可以提出離婚。就算結咗婚超過3年，提出離婚都要有一個導致婚姻破裂且無法挽回嘅理由，呢個理由唔係話大家性格不合就過到骨，而係犯咗通姦罪、遺棄對方至少2年呢類比較嚴重嘅理由。即使一對夫婦有合理嘅理由要申請離婚，但雙方起碼要分居3年，如果有一方對離婚有異議，就要分居4年先得。

離婚之後，根據《婦女憲章》，男方要繼續俾贍養費俾女方，直至女方再婚為止，換言之，如果男方結過幾次婚，而女方又遲遲未結婚嘅話……不過，贍養費都係會視乎雙方實際嘅經濟能力等因素考慮嘅。阿史就覺得，咁嚴格嘅離婚手續都係想大家結婚前諗清諗楚，結婚之後要互相珍惜啫，個出發點絕對係好嘅！