早排就同史友們講過喺香港海域「港版鐵達尼新華輪」嘅發現，而近來喺新加坡又有類似嘅水下考古發現，而呢次當地嘅考古文物仲搵到有大量嘅中國陶瓷添！
近日新加坡考古部門就發布消息，指當地就發現到兩艘載滿中國陶瓷等文物嘅百年沉船。其實其中一艘沉船早喺2015年嘅一次海上作業就已經被潛水員發現，之但係水下考古係相當具有難度，所以要去到2019年先至喺第一艘附近發現到第二艘沉船。
雖然兩艘船隻嘅位置相近，但經過考古學者挖掘、研究之後，就發現原來佢哋係嚟自唔同朝代。第一艘沉船上嘅中國陶瓷係可以追溯到14世紀，當中就有括龍泉盤、碗同埋罐，瓷器殘片中仲有唔少具有雙魚圖案、元代蓮花牡丹紋，好多作品都係相當罕見。
至於第二艘沉船就係一艘商船，估計就係喺1796年果陣喺中國前往印度途中沉沒，而喺船身入面就搵到中國陶瓷、銅合金、玻璃砂瑪瑙製品、陶製鴨子、觀音頭像、歡喜佛像等，甚至仲有九門大炮，呢啲發現真係破晒新加坡嘅考古紀錄。
原圖嚟自網絡