之前講過國學大師、「飲冰室」主人梁啟超，今次講講佢個仔、著名建築師梁思成。梁思成一生致力保護中國古代建築同文化遺產，曾經有人形容，佢對古建築嘅熱愛，就好似對待一個鍾愛一生嘅情人咁。

1933年，一首童謠令梁思成知道應縣木塔（佛宮寺釋迦塔，位於山西朔州市應縣，係世界現存最古老、最高嘅木塔）嘅存在。而實際上，梁思成當時手頭上連一張塔嘅相都無，但梁思成未見過個塔就已經對佢魂牽夢繞。梁思成太太林徽因話，梁思成自從知道有呢座塔開始，對於塔嘅關心程度幾乎超過咗自己嘅生活，佢朝早洗臉、食飯就連行步路，都係諗緊點去睇座塔，見到塔之後又點樣勘測等等。思塔心切嘅梁思成已經等唔切要睇座塔嘅真面目，就寫信去應縣，請當地嘅影相館主人影一張應縣木塔嘅相寄俾佢，仲話會如數支付全部費用。

等到梁思成終於親身實地去考察應縣木塔嘅時候，木塔日久失修，除咗幾條鐵索之外，無任何可以攀援嘅工具，而當時梁思成隻腳唔好，全靠學生時代訓練嘅臂力攀爬。突然間一聲驚雷，梁思成嚇咗一跳，差啲鬆開咗鐵索，而當時佢離地下有成60幾米，認真牙煙。喺當時果個交通不便又有戰亂嘅年代，梁思成就帶住營造學社嘅成員，走入荒蕪艱險嘅地帶，共測繪咗2783座古建築，簡直可以話係用生命嚟保護建築文物。

圖為梁思成林徽因夫婦合照，以及梁思成手繪嘅應縣木塔圖，網絡圖片。