早前去新加坡做嘢，當地朋友帶阿史食特色娘惹菜，甜得嚟又辣辣地，都幾得阿史歡心。娘惹菜响新加坡同馬來西亞都好受歡迎，香港都有餐廳主打娘惹菜，其實娘惹菜到底係咩菜式？

話說華人同馬來人通婚後所生嘅後裔，男性被稱為「峇峇」，女性就被稱為「娘惹」，佢地嘅飲食習慣融合雙方嘅優秀之處：中式食物同烹調方法，配以多種馬來西亞嘅香料，炮製出fusion嘅娘惹菜，口味會因應地區唔同而有所分別。娘惹菜常用香茅、辣椒、羅望子、椰漿等等材料，味道夠濃，啱曬重口味嘅食客。

近排香港好熱，阿史就介紹娘惹嘅開胃菜Kueh Pie Te（小金杯）畀大家。依道菜嘅賣相好似cupcake，外面嘅杯形薄脆夠香口，入面嘅餡主要係炒過嘅沙葛、蘿蔔等等蔬菜，仲有蝦米，夾埋口感好爽脆，再點埋甜醬同辣椒醬，極之醒胃。

除咗小金杯之外，娘惹菜仲有黑果燜雞等等著名菜式，有機會下次再同大家介紹美食。