阿史以前上中史，有個阿sir好憎慈禧太后，話佢一生奢侈揮霍、把持朝政，死後終於有報應，就係被孫殿英偷走晒佢生前最寶貝嘅陪葬品，聽講仲要被鞭屍。阿sir嗰種激動嘅神情，令唔少同學都專心聽佢講嘢，真係好難得。

孫殿英，人稱「孫老殿」，大字都唔識多隻就做咗國民革命軍第六軍團第十二軍軍長。據講，孫殿英第一次去東陵係為咗捉盜墓賊馬福田，不過見到東陵外廓嘅珍貴殿宇木料之後，起咗歹心。於是，佢先致函俾遵化縣知事，要求遵化縣幫佢僱30幾輛騾馬車，方便佢喺其他地方運軍糧過嚟，為搬運盜墓珍寶預先鋪好路。之後，孫殿英又以軍事演習需要施放地雷為名，趕走守陵人，封鎖東陵。

孫殿英部隊靠一個建陵老人搵到慈禧墓入口，一班人根本唔識開墓，夾硬用炸彈炸開墓穴，將慈禧嘅陪葬品洗劫一空，連慈禧嘅金絲楠木棺槨都被劈開，將棺內嘅珠寶一掃而空。而慈禧嘅屍體被拖出棺外後，由於身上穿戴嘅衣物首飾全部都係珍品，結果梗係通通被剝晒落嚟，無一倖免。乾隆墓嘅情況更慘烈，帝、后、妃6具屍首入面得一具係完整嘅，殘骨撈埋一齊，早就分唔到邊嚿骨屬於邊個人。而乾隆嘅下頜仲碎開兩邊，髪辮同肋骨被隨意拋置喺墓門外。

此事傳出之後，舉國震驚，但孫殿英用偷返嚟嘅珍寶，例如九龍寶劍、翡翠西瓜、夜明珠等送俾蔣介石、宋美齡、宋子文、何應欽、孔祥熙、戴笠等關鍵人物打點一番，成功令逃避罪責，逍遙法外。

圖為孫殿英像及盜墓情景圖。網上圖片