以前讀書果陣，個歷史阿sir提起慈禧嘅時候，都一定會講佢點樣「敗家」，但到底慈禧揮霍到咩程度？今日等阿史同大家簡單介紹返。

首先係飲食方面，慈禧嘴刁，從來都唔會將就，就算後嚟逃難去西安果陣，行宮入面都有仿照紫禁城裏面專門為佢而設嘅御膳房，下面又分葷局、素局、菜局、飯局、茶局、點心局等十幾個局，每個局都有十幾個廚師，而每餐嘅菜單都有百幾道餸俾慈禧揀。走難果陣尚且咁鋪張，可想而知佢平時有幾奢靡。正餐之外，慈禧仲好中意食生果，夏天中意食西瓜，但佢只係會食西瓜中間果一羹仔果肉，一次可以食到300幾個西瓜。慈禧尤其中意食蘋果，平均每日可以「食」到400幾個。點食得落？其實慈禧唔係真係用嚟食嘅，佢只係中意陣果香，成日擺啲蘋果喺間房度聞。等到啲蘋果無晒味，又換過一批新鮮嘅，認真浪費。

總所周知，慈禧好貪靚，靚衫靚首飾梗係唔少得，單係去一次奉天（今瀋陽），就要特登用一卡車廂嚟運過千件衫。而佢日常所有用品無一不精，就連用嘅毛巾都係上等工藝品。慈禧每沖一次涼，毛巾抹一次就丟一條，足足要用成百條毛巾先沖到一次涼。以上都只係慈禧奢侈生活嘅冰山一角，咁大洗法，大清就算有幾多金山銀山都唔夠佢揮霍喇，又難怪阿sir咁憎佢嘅。

圖片嚟自網絡。