上次講到香港第一位女警係响1949年招募嘅高健美（又名許錦濤），咁大家又知唔知首批女消防員係幾時先出現呢？

答案就係1993年喇。話說喺1868年成立嘅香港消防局，喺1993年先至第一次招募女消防隊長，而當時就有兩個人獲聘，分別係郭麗珊同胡麗芳。胡麗芳就曾經話過，女性溝通能力較好，所以女消防員特別適合處理一啲企圖自殺、精神病患者個案，每次除低頭盔，「喂，有無見過女消防員？」都能夠轉移對方視線。

胡麗芳加入消防之前係體育老師，當年佢見到消防處嘅招聘廣告上面提到，消防處125年來第一次招聘女性加入，於是佢把心一橫，剪咗及腰長髮參加，結果順利通過晒啲筆試、口試同埋體能測試，成為首位女消防隊長。要成為女消防，可以話係一啲都唔簡單，因為女性一般體能都不及男性，而喺訓練嘅時候，女性係唔會得到任何優待，佢曾經講過，當時要喺1分鐘內孭住18公斤重嘅氧氣樽爬上條梯，又要喺11秒內將條好重嘅消防水龍帶拖出23米。無論男女消防員，佢哋都同樣要孭住60-70磅嘅裝備走入火場，所以平時嘅訓練都咪話唔辛苦！

體能完全無問題嘅胡麗芳細個原來體弱多病，出世只重3磅半，又曾經患上腦膜炎同埋肺癆，中學喺醫院隔離咗成年先至可以返屋企，出院之後胡麗芳決心做運動強身健體，後來仲成為香港籃球隊代表，最終做埋體育老師同消防隊長。