已故泰王普密蓬

泰國係香港人熱門旅遊地之一，今日同大家講講泰國定海神針、已故泰王普密蓬。普密蓬1927年生於美國麻省，去過瑞士洛桑讀書。1946年佢嘅哥哥、泰王拉瑪八世於槍擊意外中駕崩，所以當時19歲嘅普密蓬於6月登基，成為拉瑪九世。之後佢响巴黎邂逅駐法國大使嘅女兒詩麗吉，兩年之後佢哋就拉埋天窗。

普密蓬在位70年，經歷過19場政變、19部憲法同35位總理。深受泰國人歡迎嘅佢，生前是全世界在任時間最長嘅國家元首。身為一國之王，爵士樂、色士風都難佢唔到，佢仲係東南亞運動會拎過金牌，甚至擁有自己嘅發明，瓣瓣掂真係唔到你唔服。

普密蓬2016年逝世之後，由佢個仔哇集拉隆功繼位，是為拉瑪十世，依位泰王好出格，有機會下次再講。