詩人徐志摩一生入面有三個重要嘅女人，其中一個係阿史之前講過嘅林徽因，今日就講埋另一個同樣有才女之名嘅陸小曼。徐志摩同第一任妻子張幼儀嘅婚姻係包辦婚姻，徐志摩自己極唔情願，佢當時中意林徽因，可惜林徽因已經同建築師梁思成共諧連理，就係呢個時候，佢遇到咗陸小曼。

陸小曼出身名門，有美貌有才情，係當時上流社會嘅名媛。佢17歲嗰時已經成為著名外交家顧維鈞嘅助手，後嚟同陸軍少將王賡結婚，二人郎才女貌、門登戶對，理應係天作之合，但王賡為人木訥，每日都好忙，令陸小曼對呢段婚姻漸漸不滿。徐志摩同王賡同為思想家梁啟超嘅學生，王賡成日唔得閒陪陸小曼，徐志摩同陸小曼就因此越行越近。呢兩個對各自婚姻都不滿嘅人，好快就擦出愛火花，不顧世俗眼光堅持要同原配離婚。

徐志摩同陸小曼嘅結合得唔到親戚朋友嘅祝福，徐家唔承認呢段婚姻，仲對徐志摩實行經濟封鎖，連幫佢哋證婚嘅梁啟超都當衆大鬧徐志摩「性情浮躁」、「用情不專」。兩人婚後的確過咗一小段快樂嘅日子，但陸小曼過慣奢侈生活，婚後亦揮霍無度，徐志摩自己節衣縮食、四處奔走賺外快都唔夠陸小曼揮霍。陸小曼後嚟仲染上鴉片毒癮，徐志摩喺勸佢戒煙嘅時候兩人發生爭執，陸小曼擲爛咗徐志摩嘅眼鏡，徐志摩負氣出走。臨走前，陸小曼仲同徐志摩講咗句：「你若坐飛機死了，我便作風流寡婦！」結果一語成讖，徐志摩後尾真係因為搭飛機死咗，陸小曼從此真係變成寡婦。

圖為徐志摩同陸小曼合照。網上圖片