上次同大家介紹過香港第一位陀槍師姐、十姐林靄思執行任務時獲得配槍，今日就再講講十姐點樣成為香港第一批女警。

話說當年林靄思斷斷續續咁讀完中三之後，以幫小學生補習維生，每月賺到成120至140蚊。有一日表哥話佢知警隊首次招募女警，每月人工有成174蚊，仲有退休金，搞到林靄思心郁郁，去警察總部投考。

第一關係筆試，考兩條數學題同中文默書，由姓黃嘅師爺（即係警隊文員）讀報紙，考生寫錯三個字就無得留低。過關之後就到面試，由一個女副督察同兩個外籍警官「三師會審」，點知面試時個女副督察提到訓練時嘅體能要求好高，嚇親林靄思，搞到佢之後諗住放棄。

不過好多嘢真係整定，林靄思首輪面試後轉咗去親戚間書店打工，居然遇到黃師爺，對方知道十姐嘅擔憂之後，安慰咗十姐一輪，仲鼓勵佢去第二輪面試。

去到第二輪面試，副處長問「點解要做女警？」十姐就照直講，話人工福利好，同埋可以增廣見聞、為市民服務。十姐當時見到副處長不斷點頭，即刻放低心頭大石。幾個月後，十姐收到通知入學堂受訓，成為女警學員嘅一份子。

圖為女警首次著上1953年引入嘅夏季制服，前排中係香港首位女警高健美（又名許錦濤），後排右一係十姐。網絡圖片