喺中國古代歷史上，有唔少讀書人將科舉及第作為一生嘅奮鬥目標，但偏偏有個人，明明中咗狀元，都毅然放棄官位走去從商，佢就係近代實業家張謇。

張謇係江蘇海門人，佢嘅狀元之路其實好坎坷，先係冒用人哋個名應試被當事人告發，後尾加入淮軍將領吳長慶手下做幕僚，有幸得到清朝重臣李鴻章、張之洞嘅賞識，不過張謇拒絕被招攬，再次回鄉考科舉。佢考咗幾次會試均以失敗告終，好唔容易中咗個狀元，又適逢父親去世要守孝3年。時光流逝，迂迴曲折嘅狀元路令張謇開始淡泊功名，與此同時，甲午戰爭以清政府落敗、簽訂《馬關條約》告終，呢件事觸動咗張謇，令佢決心以實業救國。

唔知係巧合定整定，張謇嘅創業之路同佢嘅狀元之路一樣咁坎坷，首先開廠需要招募商股，佢多次奔走上海、武昌，靠賣字籌募旅費，點知安裝好機器之後，又因資金短缺收購唔到棉花，後尾好彩得地方公款支持，佢嘅大生紗廠先得以喺1899年正式開張。開廠一年之後，紗廠已經有2.6萬兩白銀嘅凈利潤。除咗紡織業，張謇仲陸續創辦咗銀行、麵粉廠、墾牧公司等共69間企業，佢嘅事業亦都達到頂峰，被公認為「東南事業領袖」。

發展實業之外，張謇亦創辦咗中國近代第一間私立師範學校，並用佢賺得嘅錢用作教育、慈善嘅公益經費。多年努力，終於得到回報。

原圖嚟自網絡。