「恨不抗日死，留作今日羞。國破尚如此，我何惜此頭。」留低咗呢首詩，一心抗日嘅吉鴻昌慷慨就義，死咗喺刑場上。

吉鴻昌喺河南扶溝呂潭鎮出世，屋企環境唔好，只係斷斷續續讀咗2年書。1913年，吉鴻昌入咗陸軍上將馮玉祥麾下當兵，因驍勇善戰而屢立戰功，吉鴻昌好快就由普通士兵升至軍長。升官之後，吉鴻昌拎出自己全部積蓄，回鄉將一間破廟改成學校，俾貧困子弟免費讀書。而吉鴻昌本住「做官即不許發財」嘅宗旨，嚴於律己，將自己慳返嚟嘅錢做公益，亦約束自己嘅部隊，唔準佢哋擾民。

1930年，吉鴻昌所在隊伍被蔣介石收編，佢被任命做師長，奉命圍剿共產黨嘅根據地。但吉鴻昌唔肯幫蔣介石打內戰，一路hea住應付。蔣介石察覺到吉鴻昌有異心，解除咗佢嘅職務，強令佢出國。適逢九一八事變，吉鴻昌發電報俾蔣介石，請求一致對外抗日遭拒。1932年，吉鴻昌變賣家産購買槍械，聯絡舊部共同抗日，並加入共產黨。1934年，吉鴻昌以「叛國罪、叛黨罪」被國民黨政府逮捕，隨後送到北平監獄處決。吉鴻昌嘅女兒吉瑞芝話「『恨不抗日死』係父親呢一世最大嘅遺憾。」

原圖嚟自網絡。