早排同大家介紹過畫馬畫到出曬名嘅徐悲鴻，提到佢慧眼賞識畫蝦好叻叻豬嘅齊白石，今日一於同大家講少少關於齊白石嘅得意故仔。

之前嘅文章都提過，徐悲鴻成日去動物館睇馬，畫過超過一千張馬嘅速寫，甚至學過點樣解剖隻馬。唔知係咪名畫家嘅諗法都有啲相似，齊白石同徐悲鴻一樣，對自己所畫嘅對象有深刻嘅認識。齊白石細細個住响水塘旁邊，成日釣蝦嚟玩，青年時期已經開始畫蝦。到咗40歲，佢臨摹李復堂等明清畫家嘅畫蝦作品，就算去到63歲，畫蝦畫到出神入化嘅齊白石依然認為畫出嚟嘅蝦唔夠生動，於是响碗入面養咗幾隻長臂蝦，放喺畫枱之上，日對夜對，畫蝦嘅手法亦因而改變。

據講外人要齊白石畫蝦，係逐隻計。點知有一次，求畫者唔跟規矩，好似買嘢講價咁，要求額外畫多一隻，齊白石唔係咁高興，但都照畫多隻。求畫者一望，O咗嘴，因為最後嗰隻蝦走曬樣，毫無生氣。齊白石就話，「依隻蝦唔包括响價錢入面，所以幫你畫咗隻死蝦，當係免費贈送」。雖然幅畫零舍「與眾不同」，不過樂觀啲諗，幅畫作蘊含咗個特別故事，仲有意義添。

圖片嚟自網絡。