今日係一代功夫巨星李小龍嘅78歲冥誕，世界各地有唔少影迷依然好懷念呢位傳奇巨星。講開佢嘅功夫，李小龍好打就全世界都知㗎喇，但究竟佢好打成點？

阿史印象最深刻嘅係李小龍嘅Sidekick，據講佢出腳快到可以一秒踢6腳。報道話洪金寶當年曾經同李小龍過招，洪金寶啱啱想出腳果陣，李小龍隻腳已經踢到埋嚟面前。李小龍唔單止出腳夠快，佢仲可以一腳踢穿45公斤嘅沙包，甚至將一個200磅嘅壯男踢飛至20米外，可謂又快又犀利。

除咗腳法勁之外，李小龍嘅拳法亦相當有名，佢一拳可以打到成350磅嘅力度，雖然話世界拳王泰臣、阿里都打到呢個力度甚至更高，但李小龍同佢哋嘅體重差距比較大，自然唔可以相提並論。

李小龍之所以有咁嘅好功夫，當然離唔開苦練，佢每日打5000拳、跑2.5公里路，齋係每日花喺練功嘅時間就有成5個鐘，真係想唔成功都難！

圖片嚟自網絡。