上次講到香港第一位陀槍師姐、十姐林靄思點樣闖關同面試，成為女學警，今次不如就講埋頭幾班女警入學堂受訓嘅情形。

介紹少少背景資料先， 黃竹坑警察學校喺1948年成立，而第一批女警就喺1951年受聘同埋入學堂受訓，當時學堂附近仲係好荒蕪嘅郊外，無公共交通工具入去，於是警隊就安排咗大卡車接送教職員往返警校同中環。由於第一批女警唔洗喺警校留宿，咁班女警每日就搭呢架車出入學堂受訓，而訓練嘅內容包括法例、步操、槍械操作理論同埋柔道。

當時警隊高層好希望呢個女警計劃可以成功，所以給予女警唔同方面嘅優待，就好似當時男警要受訓6個月，但女警就只係受訓4個月。另外一啲較辛苦嘅體能訓練、烈日當空或大雨下嘅步操都可以豁免，女警食完午飯仲有半個鐘午睡時間添。之後班女警完成訓練，唔洗考體能測驗都可以畢業。但佢哋嘅師妹就無咁著數喇，據講之後出任女警副班主任嘅香港首位女警高健美（又名許錦濤），對女警學員嘅要求嚴格好多，一旦有學員分心，就會被佢用教杖打，有女警認為受過高健美嚴格訓練之後，工作表現的確會好啲，啲女學員仲稱呼佢支教杖做「精神棒」，打完即刻精神曬，唔通真係「嚴師出高徒」？

喺第一批女警畢業之後，佢哋被派去唔同嘅警署工作，雖然人工較男警低20%，但同事同上司都相當照顧佢哋，唔洗佢哋輪班，只需要返日班同埋負責文職工作，可以話係相當清閒。

圖片為第一屆女警學員畢業照。網絡圖片