半個世紀好長，如果失去自由，半個世紀就更長。1936年12月西安事變後，東北軍少帥張學良於31日被判處十年徒刑，之後蔣介石「特赦」佢，但係又唔放人，交由軍事委員會「嚴加管束」，展開張學良超過五十年嘅囚禁生活。

張學良最先被囚於南京孔祥熙公館，之後輾轉去過奉化、安徽、湖南、重慶、台灣新竹縣嘅溫泉等，過住被監視、無自由嘅歲月。其中1937年發生盧溝橋事變，張學良曾經寫信畀蔣介石，要求參與抗日戰爭，但對方只係叫佢「好好讀書」。

直到蔣介石同佢個仔蔣經國先後去世，張學良去到1990年、被囚禁54年後終於獲釋，當時佢差唔多九十歲，已經係遲暮老人。

大圖係被囚禁嘅張學良與秘書趙一荻。細圖左起係張學良、宋靄齡、張學良原配于鳳至、宋美齡及蔣介石。原圖嚟自網絡。