之前講到張學良被蔣介石囚禁，响幽居歲月之中，一直陪伴佢嘅，係毫無名份嘅秘書趙四小姐，而且兩人一過，就係大半生。

趙四小姐趙一荻（Edith）於香港出世，生於自官宦之家，家中排行第四。據講趙一荻又靚又聰明，十四五歲左右就成為《北洋畫報》嘅封面女郎。佢同張學良於一次舞會中邂逅，不過趙爸爸知道孻女居然中意咗一個有婦之夫之後好嬲，於是軟禁趙一荻。愛情至上嘅趙一荻選擇私奔，搞到屋企同佢斷絕關係。

少帥府方面，張學良嘅原配于鳳至一開始無承認趙一荻嘅身份，只畀佢做張學良嘅「秘書」。雖然無名無份，但趙一荻依然於1929年幫張學良生咗個仔。經歷過九一八事變、西安事變之後，張學良被蔣介石囚禁。1940年于鳳至到美國醫病，趙一荻將個仔託付畀朋友後，以秘書身份返去張學良身邊，陪住失意嘅丈夫，成為張學良嘅重要支柱。

二十多年之後，于鳳至1964年主動同張學良解除婚約，同年7月4日，64歲嘅張學良同51歲嘅趙一荻响台灣結為夫妻，當時佢哋已經一齊超過三十年。之後張學良獲釋，同埋趙一荻定居夏威夷。趙一荻逝世後，墓地旁邊預留咗位置畀張學良。而張學良講過，佢依一生，欠趙四小姐太多。

原圖嚟自網絡。