之前講過飛虎將軍陳納德組成志願軍到中國參加抗日戰爭，今日一於介紹埋佢太太陳香梅。叫得做傳奇男女，陳香梅嘅一生唔會比丈夫輸蝕，活躍於政界同外交界嘅佢，究竟有咩特別經歷？

陳香梅1925年於北京出世，抗戰時期去咗香港，於九龍真光讀書，香港淪陷後，佢去粵北嘅嶺南大學讀書。19歲嘅陳香梅畢業後成為記者，被派去昆明採訪飛虎將軍陳納德。經過兩次採訪，兩人一見鐘情，三年之後，22歲嘅陳香梅嫁畀54歲嘅陳納德。

陳納德1958年病逝後，陳香梅帶住兩個囡响華盛頓生活，仲加入咗共和黨。1963年時任美國總統甘迺迪委任陳香梅處理進出口貿易等事宜，令佢成為首位入白宮做嘢嘅華人。

去到八十年代，列根於1981年就任美國總統，當時陳香梅擔任列根特使訪華，同時任中國領導人鄧小平會面。當時陳香梅坐第一，參議員史蒂文斯坐第二，鄧小平話，「因為參議員在美國有100個，而陳香梅嘛，不要說美國，就是全世界也只有一個」。

原圖嚟自網絡。網絡圖片