約翰連儂

中意聽搖滾樂嘅朋友一定聽過約翰連儂個名，佢係史上最受歡迎樂隊披頭四（The Beatles）嘅成員之一，可惜喺1980年12月8日被槍殺而死，終年僅40歲，依個消息傷透咗無數樂迷嘅心。

約翰連儂可以話係披頭四嘅核心成員，佢嘅童年並唔愉快，由姨媽姨丈湊大，佢讀書成績唔叻，同老師又唔夾，姨媽就送咗佢去藝術學校讀書，反而令約翰連儂可以發展佢嘅音樂潛能。16歲果陣，約翰連儂已經同朋友組成The Quarrymen樂團演出。跟住約翰連儂相繼遇到披頭四嘅其他成員，組成呢隊舉世矚目嘅樂隊，留低咗<Yesterday>、<Hey Jude>、< Let It Be >等經典名曲。

之後約翰連儂單飛，同日裔女友小野洋子結婚，移居美國。兩夫妻屬於比較激進嘅和平主義者，創作咗<Imagine>，公然表達反宗教、反民族主義、反傳統、反資本社會嘅信息，呢首歌被《滾石》雜誌評係約翰連儂送俾世界最偉大嘅音樂禮物，仲被選為「史上 500 首最偉大歌曲」嘅第3位。不過，約翰連儂一系列主張和平嘅行為太出位，甚至有直接同政府對抗嘅意味，據講美國前總統尼克遜相當不待見佢，仲下令一旦約翰連儂離開咗美國，就永遠都唔俾佢返嚟。