早前介紹咗新聞博覽館嘅精彩內容，大家有無發覺好似差咁啲嘢？無錯，未講棟建築嘅歷史。其實博覽館位於必列者士街2號，最早係一間臨時嘅佈道所，由喜嘉理牧師建立。當時必列者士街屬於華人聚居地，孫中山1883年嚟到香港，並入讀中央書院（皇仁書院前身），正正就住响佈道所之內，佢仲以「孫日新」嘅名字，於佈道所接受洗禮。

二戰之後，必列者士街建築受損，淪為一片頹桓敗瓦，政府1953年將原本佈道所嘅位置改建為必列啫士街街市，後嚟一樓部份仲改建咗做兒童遊樂場，參觀時見到博覽館嘅跳飛機數字真係咩回憶都返曬嚟。舊街市2011年獲評定為三集歷史建築，其後更活化成為新聞博覽館，入面保留咗舊街市嘅樓梯、上海批盪等特色。

睇到依度，唔知各位史友有無留意到，阿史用咗「必列者士街」同「必列啫士街街市」？唔好以為打錯字，其實有段故架，話說條街嘅命名可能係同開埠初期一位大律師William Bridges有關，當年個名由華人「師爺」翻譯，所以會出現「者」同「啫」並存嘅有趣現象，舊街市嘅兩個出入口仲分別標出「必列啫士街街市」同「必列者士街市場」添。至於條街，唔同建築物嘅門牌各有各用，又「啫」又「者」咁，連阿史都打到好亂呀！~