電視新聞大家睇得多，連帶新聞主播都好多人認識，咁大家又知唔知第一位香港電視新聞主播係邊位？答案係毛妹，無錯，係開芭蕾舞學校個位毛妹。而更令後生一輩意想唔到嘅係，連唐太宗咩咩油嘅廣告主角、資深藝人梁舜燕，响五十年代都曾經報道過新聞，勁呀！

逐個介紹返，毛妹即係廖袁經綿响1957年6月到8月期間，於麗的映聲擔任主播，報道中英文新聞。佢當時就嚟入讀香港大學，趁住暑假到麗的打咗三個月暑期工。之後佢去倫敦深造芭蕾舞，六十年代仲返香港開芭蕾舞學校添。

至於梁舜燕，佢原本喺先施百貨售賣香水，同毛妹一樣於1957年加入麗的映聲，開頭係做報幕員，主要係報時同讀啲政府報告咁，幾個月之後做埋新聞報道，同另外兩個報道員龐碧雲同黎婉玲被稱為「麗的三花」。梁舜燕先後於麗的、無線做戲，拍過唔少深入民心嘅劇集，好似《真情》嘅上等人等，係長青女演員之一。