記得幾年前睇電影《十月圍城》，套戲一開始無幾耐，由張學友飾演嘅興中會會長楊衢雲就被清廷特工開槍射死。歷史上嘅楊衢雲究竟係點？生於虎門嘅楊衢雲，細個就同爸爸嚟香港定居，最初喺海軍船塢做機械學徒，後來發生意外斷咗三隻手指，之後就改學英文，做過教員、招商局同沙宣洋行副經理，英文唔錯。楊衢雲當時眼見有同胞被外國人欺負，於是決心要振興中國。喺1890年，楊衢雲創立革命組織「輔仁文社」，以開通民智為宗旨，實質就係宣揚反清思想，據講楊衢雲曾經去過西醫學院講革命思想，連孫中山都係聽眾之一。

楊衢雲1895年同孫中山創立興中會，佢因為年資較長而出任首任會長。1900年，楊衢雲發動惠州起義失敗，清廷認定楊衢雲係主謀，列佢做通緝犯，仲派人殺佢。1901年1月10日，楊衢雲喺中環結志街52號輔仁文社教緊英文嘅時候，被殺手陳林槍殺，終年僅40歲。

事後一班友人將楊衢雲安葬喺跑馬地香港墳場，為免墓碑被破壞，所以無刻名，只留下「6348」四個數字。去到2011年，為紀念辛亥革命一百年，當局响墓嘅旁邊整咗塊說明牌，等大家知道烈士長眠之地。而楊衢雲遇刺嘅地方，就成為今時今日「孫中山史蹟徑」第7站。

原圖嚟自網絡。