之前講過吓慈禧嘅奢侈生活，今日就繼續帶大家窺探依位太后喺頤和園嘅生活。話說慈禧70歲果陣，曾經傳宮外人入宮留宿咗成個月咁耐，令外人有機會知道呢個對清朝影響深遠嘅女人，佢嘅日常生活到底係點。

慈禧朝早都定時起床，梳洗完畢之後就會有太監揭開簾，然後內庭滿殿等候嘅太監就會跪低，一齊高呼「老祖宗吉祥」，相當大派頭。慈禧會先批閱奏摺，去仁壽殿傳見臣下，再返樂壽堂傳膳。佢同好多都市人一樣，中意食飯後果，食完正餐再食啲生果、點心，食完仲會出去散步消滯，認真識養生。佢跟住會瞓返個午覺，叉一叉電。

至於下晝慈禧有咩消遣？以前嘅娛樂無宜家咁多，不外乎都係睇吓戲、聽吓曲咁，而慈禧亦有佢專屬嘅「戲曲班子」，就係將太醫院嘅大夫叫嚟，跪喺度朗讀四書。有時佢心血來潮，仲會叫太監戲班上陣清唱一番，當然慈禧嘅排場要再大一啲，雖然係清唱，但亦有專業名伶例如譚鑫培等現場指導。有時慈禧興致一到，會去聽鸝館度畫畫，除咗有專人服侍作畫之外，仲有雲南女畫家繆嘉惠從旁「指點」一二。玩到咁上下鐘數，慈禧就開始食晚飯，寫吓大字之後仲有餐宵夜，食完先返寢宮。據講有時慈禧會叫太醫院出吓燈謎嚟做飯後餘慶節目，咁睇落太醫院嘅大夫都真係需要多才多藝，既要精通醫術，又要有返咁上下文采出燈謎，間中仲要朗誦添，太醫認真唔易做。

圖為慈禧太后頤和園生活展嘅展品。原圖嚟自網絡。