阿史記得多年前睇《十月圍城》，最鍾意嘅角色係由內地影帝王學圻飾演嘅李玉堂，喺戲入面佢支持朋友秦少白（梁家輝飾演）搞革命，但就堅持「出錢唔出力」原則，秘密地出錢資助，同時反對自己個仔李重光參與革命，兩父子因而發生唔少爭拗，王學圻簡直將李玉堂嗰種內心戲演得出神入化。其實戲入面嘅李玉堂、李重光同秦少白，分別係以香港商人李煜堂父子同「四大寇」之一嘅陳少白為藍本。真實嘅李煜堂查實參加革命活動時相當積極，出錢又出力。

李煜堂生於廣東台山，年輕時於廣州學醫，之後同兄長去美國經商，賺咗筆錢後就嚟咗香港上環創辦金利源，經營藥材生意，後來仲涉獵電力、麵粉、進出口、保險等行業，被當時人稱為保險大王。除咗做生意叻，李煜堂一直以改革滿清為己任，仲將個仔李自重送到日本讀書。1905年，喺李自重同女婿馮自由介紹之下，李煜堂就加入咗同盟會。翌年，李煜堂見到同盟會宣傳機構《中國日報》經費不足，就斥資購入，並交由馮自由主理，合力宣揚革命思想。

李煜堂加入同盟會之後，負責情報同財政工作，後嚟《中國日報》受香港政府監視，佢就將金利源當做同盟會秘密基地，甚至於店內儲存軍火。據李氏後人所講，李煜堂為咗1911年黃花崗之役，响一晚內籌到80萬軍費，第二日就運去廣州。革命成功之後，李煜堂就出任財政部長，但從政半年之後就急流勇退。不過佢依然相當支持中國革命活動，喺討伐袁世凱、護法運動嘅時候，亦一直為孫中山籌募軍費。

原圖取自網絡。