噚日講到喺電影《十月圍城》入面，商人李玉堂同佢個仔李重光（以歷史人物李煜堂、李自重兩父子為藍本）因為對革命有唔同意見，而關係唔好，但現實中李煜堂係相當支持李自重參與革命。李自重個女李芳曾經接受訪問，澄清爸爸同電影唔同，並無因為保護孫中山而犧牲，相反係活至96歲先逝世。

李自重早年學習電機工程，後來去咗日本橫濱留學，仲加入咗孫中山創辦嘅革命軍事學校，成為第一批學生。1905年，佢同妹夫馮自由加入孫中山創辦嘅中國同盟會，其後李、馮二人奉孫中山之命，返香港同澳門招收會員，並成立香港同盟會。

李自重除咗主持會務，佢仲喺九龍開設光漢學校，將軍事訓練加入課程，希望實現富國強兵嘅理想，有唔少學校照辦煮碗，增設軍事訓練課程。點知香港政府受到清廷施壓，話軍訓屬於非法，將李自重驅逐出境，李自重輾轉去廣州習醫，一學就4年。畢業之後，佢幫手治療黃花崗之役嘅傷兵，又喺故鄉台山糾眾起事。

辛亥革命後，李自重同爸爸李煜堂一齊引退，回歸商界，佢出任香港廣東銀行、上海聯保水火險有限公司高層。唔講唔知，原來佢又做過香港南華體育會主席，推動體育、全民自強。李自重喺1971年逝世，同爸爸一齊葬喺薄扶林基督教墳場。

圖為李自重真人及電視劇《十月圍城》入面由鍾漢良飾演李重光。原圖取自網絡。